María Ellingsen er fædd í Reykjavík 22.janúar 1964 og er af íslensku, færeysku og norsku bergi brotin. Hún talar íslensku, færeysku, dönsku, ensku og þýsku.

Hún fór snemma að leika á sviði og í kvikmyndum og hélt til Bandaríkjanna 20 ára gömul til að nema leiklist. Hún lauk BA gráðu frá The Experimental Theater Wing í New York Háskólanum 1988. Sú leiklistaraðferð sem var kennd við ETW byggði mikið á líkamlegri tjáningu, rödd og spuna í anda Grotowskis, sem heimsótti deildina og leiddi leiksmiðjur. Nemendur lærðu að frumsemja verk með Devised theater aðferðinni þar sem uppsprettan er orð, hlutur eða þema. Mikil áhersla var lögð á dans í anda Merce Cunningham, Mary Overlie kenndi Viewponts, raddþjálfun var í anda Roy Hart og Avant garde leikstjórar á borð við Robert Wilson, Richard Forman og Ann Bogart voru meðal þeirra sem leikstýrðu nemendaleikhúsinu. Á sama tíma þjálfaði María sig í kvikmyndaleik í samstarfi við Kvikmyndadeild New York Háskóla og hafði við útskrift leikið í ótal stutttmyndum auk tveggja íslenskra kvikmynda í fullri lengd.

Við heimkomuna var hennar fyrsta hlutverk á leiksviði í Þjóðleikhúsinu og meðal hlutverka þar eru; Cecile í Hættuleg kynni og Miranda í Ofviðrinu. Hún fór svo aftur til New York til að bæta við sig leikhúsreynslu en tilboð um að leika hlutverk hinnar austurþýsku Katarinu í sjónvarpsþáttunum Santa Barbara dró hana til vesturstrandarinnar þar sem hún var við upptökur á 170 þáttum seríunnar. Þá tóku hlutverk í bíómyndum við; m.a. New Age hjá Warner Brothers og Mighty Ducks 2 hjá Disney og Deadly Currents hjá Showtime.

Það var íslenska kvikmyndin Agnes sem kallaði hana heim til Íslands á ný en í henni lék hún titilhlutverkið, vinnukonuna sem drap ótrúa elskhugann sinn og týndi fyrir það eigin lífi á höggstökknum. María var valin besta leikkonan á kvikmyndahátíðinni í Verona, fyrir Agnesi. Síðan hafa hlutverkin verið mörg í leikhúsi, sjónvarpi og kvikmyndum á Íslandi og erlendis.

María rekur einnig sitt eigið leikhús Annað Svið sem hún geymir í vasanum og tekur fram þegar gott leikrit knýr hana til framkvæmda. Þar á meðal hafa verið Sjúk í ást , Beðið eftir Beckett, Svanurinn þar sem hún lék hjúkrunarkonuna Dóru sem verður ástfangin af svani og Salka Valka – ástarsaga í samstarfi við Hafnafjarðarleikhúsið þar sem hún lék Sölku. Dans/leikhúsverkið Úlfhamssaga sem hlaut 7 tilnefningar til Grímuverðlauna. Þar steig María fram sem leikstjóri í fyrsta sinn og fór fyrir hópi listamanna við að smíða verkið upp úr íslenskum fornaldarrímum. María leikstýrði í kjölfarið Sælueyjunni í Þjóðleikhúsinu. Og smíðaði nýtt leikverk MammaMamma í samstarfi við Charlottu Böving og leikhópinn Opið Út en það er byggt á samtölum við konur um það að vera mamma og eiga mömmu. Hún lék í MammaMamma og snéri einnig aftur á svið Þjóðleikhússins til að leika hjónadjöful í verðlaunaverkinu Heiður. Þá leikstýrði hún einleiknum Ég heiti Rachel Corrie í Borgarleikhúsinu. Þá var Ferðalag Fönixins – um listina að deyja og fæðast á ný frumsýnt á Listahátíð í Reykjavík 2011, dansleikhúskonsert í anda Úlfhamssögu og hefur ferðast á Noðrulöndum síðan, En nýjasta verkið sem er í smíðum heitir Augun mín – og fjallar um þrjár skáldkonur sem takast á við ástarsorg hver á sinn hátt.